Primeiro encontro institucional da presidenta Carmela Silva coa nova alcaldesa Verónica Tourón no que ambas as dúas mandatarias concordaron en seguir impulsando o concello que nestes 6 anos recibiu o maior investimento da historia de Deputación
O concello de Salceda de Caselas recibiu nestes seis anos investimentos da Deputación de Pontevedra por máis de 7,5 millóns de euros, (7.585.950,77€), a maior inversión feita nunca neste municipio pola institución provincial, que serviu para dotar á vila de equipamentos, servizos e dotacións que hoxe repasaron a presidenta provincial, Carmela Silva, e a nova alcaldesa, Verónica Tourón, no seu primeiro encontro institucional. Ambas mandatarias, avaliaron tamén o estado das obras que este ano Salceda realizará co Plan Concellos e, por outra banda, a alcaldesa detallou o proxecto que fará o goberno municipal co novo Plan Provincial ReacPon: a rehabilitación do Centro Social de A Devesa, que xa está en licitación e conta con todos os informes sectoriais.
A presidenta provincial e a alcaldesa avaliaron as seis obras que este ano Salceda pode executar cos 681.826,74 € euros que dispón do Plan Concellos 2021, proxectos todos eles xa concedidos pola Deputación: a reforma e acondicionamento das piscinas municipais (fase 1); a pavimentación en Pedra Carballa; a Estrada da Farrapeira a sete camiños (fase II); a rúa Joaquin Fernandez Sestelo; a reforma da Praza de Abastos; e a mellora de seguridade viaria en Bouza-Panda (Budiño). Salceda tamén ten aprobadas todas as accións da Liña 2 e da Liña 3, coa que pode financiar a contratación de 9 postos de traballo no concello, e se está tramitando a liña de axudas aos sectores máis afectados pola pandemia.
Investimentos en 6 anos
Dos 7,5 millóns de euros da Deputación, só co Plan Concellos Salceda percibiu estes anos máis de 3,9 millóns, partidas coas que puido levar a cabo 42 obras, como a humanización das rúas Compostela, Rafael Tilve e rúa Coruña; a urbanización do acceso ao novo Centro de Saúde; o Paseo fluvial e Parque Etnográfico do río Landres; a rehabilitación da antiga Casa-Escola de Vendanova; ou a mellora das instalacións deportivas de Penedo Redondo. Coa Liña 3 de emprego puido tamén financiar ata agora a contratación de 81 persoas desempregadas no Concello. Amais, Salceda foi un dos municipios beneficiados co Plan DepoRemse co que se realizou a urbanización do antigo campo da Feira da Devesa con máis de 468.000 euros; forma parte do proxecto de iluminación sostible de Fondos Europeos; dispón do servizo de Administración Electrónica e o asesoramento SmartPeme.
Con respecto ás infraestruturas, executáronse oito proxectos. Con case 1,5 millóns de euros a Deputación financiou entre eles a actuación de mobilidade sostible na EP 2505 ao seu paso polo núcleo urbano de Salceda, e a mellora de seguridade viaria entre Cerquido e Borralliño. Tamén fixéronse máis de 30 actuacións co Plan Móvese así como en pintado de estradas, sinalizacións, desbroces, atención a incidencias e conservación de firmes.
O concello participou en todas as liñas de axudas sociais financiadas pola Deputación como o Plan de Cofinanciamento, as axudas básicas de emerxencia, a teleasistencia domiciliaria ou as axudas extraordinarias pola Covid, cun investimento de medio millón de euros. E nestes anos, 3.179 persoas e 63 colectivos de Salceda participaron nos programas sociais provinciais. O mesmo en Igualdade. O concello obtivo subvencións da Deputación para a elaboración do II Plan de Igualdade amais doutras accións; tamén celebráronse 29 cursos de Conectadas e o programa Violencia Zero visitou a vila en dúas ocasións
Desde Cultura recibiu financiamento para rehabilitación e sinalización do patrimonio, actividades, de dinamización do galego e á Escola Amigos de la Musica; e desde Turismo Salceda formou parte das campañas de promocion e dinamización da provincia e ten empresas adheridas ao selo de calidade Sicted. Finalmente, no deporte, as liñas de subvencións chegaron a 8 clubs federados de Salceda, 5 colectivos, 4 deportistas de elite que dispoñen de bolsas DepoDan e DepoPromesa, 15 rapaces e rapazas da vila participaron nos campamentos polideportivos e se traballa cunha Deporte Escola de Balonmán. A Deputación tamén realizou nunha ducia de ocasións labores de mantemento dos campos de fútbol da Gándara e de Penedo Redondo.
