Mondariz goza do ‘Pump track’ máis grande de Galicia grazas ao plan concellos da Deputación

O Concello de Mondariz vén de gañar un novo e moderno espazo para o deporte no antigo campo de fútbol de A Minada, que agora alberga o circuíto “pump track” asfaltado máis grande de Galicia. A infraestrutura, que forma parte do Centro de Ocio e Deporte Urbano que proxecta o Goberno municipal, foi financiada cunha achega de 48.399 euros do Plan Concellos da Deputación de Pontevedra. Obrouse nunha superficie que supera os 490 metros cadrados, na que se construíu unha pista de 158 metros cun deseño de obstáculos moi variados co fin de ofrecer varios niveis de dificultade para as persoas usuarias.

As obras, que foron visitadas polo deputado Carlos Font, a deputada Victoria Alonso e o alcalde, Xosé Emilio Barros, acompañados de varios concelleiros/as, tiveron como obxectivo dotar ao concello do Condado dun espazo para o deporte e o fomento da actividade lúdica para usuarios de todas as idades. A nova pista de “pump truck” consiste nun circuíto para práctica de actividades con bicicletas, “skates”, patíns e patinetes con seguridade; e está adaptada ao regulamento de BMX da Real Federación Española do Ciclismo. Conta con rectas de 28, 26,5 e 10,8 metros; e modificouse recentemente para rectificar os radios de trazado das curvas, que agora están adaptados a súa viraxe natural e acadan xiros que oscilan entre os 90 e os 180 graos, e aumentar o número de saltos, que na actualidade son 26. Ademais, executouse unha capa de formigón en masa de 10 centímetros que permitiu cubrir os noiros.

A nova zona deportiva destaca pola súa localización, situada no antigo campo da Avenida Grupo Escolar, no centro urbano do municipio, xunto á Casa do Concello, o CPI de Mondariz e a biblioteca pública e preto de importantes áreas recreativas como a praia fluvial do Val. Antes da actuación, A Minada albergaba un campo de fútbol con céspede artificial e bancada de formigón que, ao non cumprir as medidas regulamentarias para a competición deportiva futbolística, estivo dúas décadas en desuso. Agora a veciñanza desfruta dunha dotación lúdica singular.

A Deputación fixo posible que o Concello de Mondariz teña recibido desde 2015 un investimento total de 3.051.161 euros, dos que boa parte corresponden ao Plan Concellos. A área de Deportes leva colaborado co municipio con máis de 30 subvencións para clubes federados e non federados e deportistas individuais que superan os 68.000 euros.