O Castelo de Soutomaior acadou este verán os mellores datos de visitas

O recinto acollerá a vindeira semana unha nova edición do programa “Os Viñedos do Castelo”, con catro sesións para dar a coñecer a finca vinícola para as que xa está aberta a inscrición

A terceira edición de “Os Viñedos do Castelo” e unha nova quenda das Visitas Caracterizadas no vindeiro mes de outubro;  son as novas actividades que lanza a Deputación de Pontevedra para pechar un verán de récord no Castelo de Soutomaior. O recinto recibiu entre xuño e este mes de setembro a 16.541 persoas, “os mellores datos da historia do Castelo”, en palabras da presidenta provincial, Carmela Silva, que referendan ao recinto como unha das iconas do novo modelo de turismo multiexperiencial na Provincia.

Esa cifra de máis de 16.500 persoas corresponde, como destacou hoxe Carmela Silva, ás que rexistraron para participar nas visitas ao Castelo, xa que non se contabilizan as que acoden ao xardín o ao recinto de forma libre. Para a Presidenta Provincial, estes históricos datos revalidan a aposta do Goberno Provincial polo conxunto, e amosan que “os investimentos que temos feito, tanto na musealización, como na contorna do xardín, e tamén as actividades que organizamos, están a ser un grande éxito”. “É un investimento pensado de forma rigorosa e planificada que ten agora estes resultados”, concluíu.

A vindeira semana o recinto acollerá as novas visitas “Os Viñedos do Castelo”, que chegan aproveitando o inminente inicio da vendima para achegar ás persoas visitantes un dos espazos do Castelo menos coñecidos. Esta iniciativa aposta por poñer en valor o produto local, neste caso a uva destes viñedos da DO Rías Baixas, e por “avanzar na liña de actividades sostibles e respectuosas co medio ambiente que permitan que a xente teña experiencias sensoriais e moi atractiva”. A Presidenta Provincial puxo en valor que amais de poder pasear polos fermosos viñedos e coñecer cales son as súas características, as persoas participantes poderán gozar “dunha contorna marabillosa e visualizar unha paisaxe que é espectacular”.

As visitas ás catro hectáreas de viñedos do castelo terán lugar a vindeira semana, os días 14, 15, 16 e 17, todas ás 17.30h, en grupos de 20 persoas. Son de 1 hora de duración e en cada unha das catro sesións persoal de Turismo fará de guía para explicar as características dos viñedos, as orixes, a Denominación Rías Baixas, os tipos de uva, as subzonas, a vide, a vendima e a explotación . As reservas xa están abertas que as persoas interesadas poden realizar a través da web do Castelo ao prezo de 6€.

Nova quenda Visitas Caracterizadas
Por outra banda, en outubro celebraranse 18 novas sesións das Visitas Caracterizadas ao Castelo, para as que hoxe tamén se abren as reservas a través da súa web. Comezarán o venres 1 ás 16 e 17:30h, seguirán o domingo 3, ás 11, 13, 16 e 17:30h; o martes 12, ás 11, 13, 16 e 17.30 h; e o sábado 9, 16, 23 e 30 de outubro, ás 11 e ás 12:30h. Están dirixidas a público adulto e haberá un total de 270 prazas, 15 para cada visita, que terá unha duración de 60 minutos e un prezo de 8€.