O Conselleiro de Cultura, Educación e Universidade visitou o centro para comprobar o avance dos traballos

A Xunta inviste máis de 410.00€ na renovación da cuberta do instituto de Mos.

O Conselleiro de Cultura, Educación e Universidade, Román Rodríguez, e a Delegada Territorial da Xunta en Vigo, Marta Fernández-Tapias, visitou hoxe o instituto de Mos para comprobar o avance das obras de renovación de cubertas que a Xunta de Galicia está a acometer neste centro. O obxectivo da intervención, tal e como sinalou, é continuar avanzando na mellora das instalacións dos centros escolares Galegos, unha tarefa á que se lle está a dar un novo pulo a través do Plan de Nova Arquitectura Pedagóxica, a folla de ruta do Goberno Galego para o deseño do novo modelo de centros postcovid.

Renovación Instituto de Mos. Fonte: Concello

“Non en balde, explicou Román Rodríguez, este verán realizamos ou iniciamos un total de 557 actuacións de mellora en toda Galicia, por importe de case 30M€, nas que se inclúe esta do IES de Mos”. “Entre as obras deste verán, as que culminamos este ano e as que estamos licitando para executar en 2022. o orzamento na área de Vigo en obras elévase a máis de 12,5M€, cun total de 82 actuacións”, engadiu.

Así mesmo, o titular do departamento educativo da Xunta destacou un investimento de máis de 1,6M€ desde 2009 nos centros educativos do concello de Mos, atendendo ás súas necesidades.

Renovación do instituto. Fonte: Concello

Mellora do illamento

O programa da intervención no instituto de Mos consiste na renovación da cuberta do centro dado o actual estado de deterioro e falta de funcionalidade. Entre as accións que se está acometendo figuran a retirada da cuberta existente e dos sistemas de impermeabilización dos encontros da cuberta, a disposición de illamento térmico sobre forxado de teito da última planta e a colocación dun novo taboleiro de cuberta en panel sándwich de chapa de aceiro.

Os traballos están neste momento en execución, aínda que se desenvolven baixo todas as medidas de seguridade e sen interferir na actividade lectiva.