O Goberno Municipal apoia o ciclo de outono da Orquestra Clásica de Vigo

Compartir
Momento da presentación do ciclo en rolda de prensa. Fonte: Concello

Baixo o lema “Concertos Malditos” desenvólvese un ciclo conformado por tres recitais, que se inicia este domingo, 26 de setembro no Auditorio Municipal.

Coa programación de outono a Orquestra Clásica retoma os recitais nas salas de concertos logo das cancelacións obrigadas pola pandemia.

 

O ciclo de outono foi presentado esta mañá por Abel Losada, o Concelleiro de Cultura, que comprometeu o apoio municipal a este ciclo e ao traballo da Orquestra Clásica de Vigo que é “un elemento estratéxico do panorama musical e cultural da cidade”. Referiuse ao sector da cultura como “especialmente afectado pola pandemia polo que é máis importante se cabe o apoio da administración pública”.

Na presentación participaron tamén Manuel Martínez, Director artístico e Manuel Martínez, Director técnico da Orquestra que explicou que os Concertos Malditos é “homenaxe a tódalas programacións que ao longo de 2020 e 2021 non puideron ser, a eses concertos que parece que están malditos, porque ata o momento foi imposible programalos” co desexo de que se poidan volver facer con normalidade, e “volver conectar co público en salas de concertos”.

 

Ciclo en rolda de prensa. Fonte: Concello

 

Este domingo, 26 de setembro, comeza a temporada de outono co concerto Maldita Percusión, ás 20:00 horas do serán no Auditorio Municipal do Concello. A segunda cita será o 23 de outubro, Maldito Beethoven con Severino Ortiz ao piano, ás 20:30 horas no Teatro Afundación.

O ciclo péchase o 28 de decembro co Maldito Concerto de Nadal, no Teatro Afundación ás 20:30 horas, co concerto para piano de Edward Grieg interpretado por Berta Fresco.