Presentación do Internacional Cidade de Vigo feminino de tenis

Compartir

Caballero di que o complexo de tenis de Samil “convirte a Vigo nun lugar sinalado fronte á terra batida do Mediterráneo”

O alcalde de Vigo, Abel Caballero, afirmou que as pistas de superficie dura do complexo deportivo municipal de Samil “convértennos nun lugar sinalado a nivel nacional” e nun excelente reclamo para as raquetas de todo o mundo que queren xogar en pista dura “ao ter o levante a hexemonía na terra batida”.

O rexedor subliñou a posición estratéxica de Vigo e as súas instalacións durante a presentación do Internacional Cidade de Vigo feminino que do 23 ao 29 de agosto organiza a Federación Galega de Tenis e que recupera tras dez anos de ausencia.

O alcalde, que estivo acompañado polo edil de Deportes, Manel Fernández, felicitou ao presidente da FGT, José Mosquera, e ao director do torneo, o vigués Pablo González, “polo piulo continuado ao tenis”, e celebrou que Vigo conte “cun gran complexo para un torneo desta envergadura”.

Caballero tamén celebrou o apoio da Deputación e afirmou que se mantén en proxecto a cubrición das dúas pistas centrais, pero é Costas a que debe dar a autorización, “hai un problema e aínda non dispoñemos do permiso”.

Ao campionato acode a medalla de bronce olímpica por Brasil, Laura Pigossi, e están confirmadas xogadoras de vinte e tres países e catro continentes. “Este evento sería imposible sen as institucións”, explicou Mosquera, que conta co apoio do Xacobeo, representado na rolda de prensa por Ana Ortiz, ademais do Concello, todo o ano, e a administración provincial.

O obxectivo deste torneo é “fomentar especialmente o tenis feminino”, manifestou o presidente federativo, e igualar ou achegar o número de licenzas femininas ás masculinas, “que hai dous anos estaban nunha relación dunha a tres e agora dunha a 2,5.

O torneo, con título individual e de dobres, está dotado con 25.000 dólares e mantén a denominación tradicional ante a International Tennis Federation (ITF).