A Xunta licita os proxectos e a construción de 57 vivendas de promoción pública en Navia, Vigo, cun investimento de 12,8M€

• Habilitaranse dous edificios de 38 e 19 vivendas de promoción pública, destinadas ao alugueiro social

• As empresas poden presentar as súas ofertas desde este martes 20 de agosto ata o 11 de outubro

• Na construción destes inmobles introduciranse novas técnicas de construción industrializada, que axunten arquitectura con prefabricación para optimizar prezo, sostibilidade, seguridade, calidade e o mellor uso e mantemento dos inmobles

• Con este grupo de vivendas, a Xunta xa ten en marcha un total de 316 vivendas de promoción pública das 359 que están previstas no Polígono 1 de San Paio de Navia

• A Xunta segue avanzando na Estratexia de vivenda pública e protexida para duplicar nesta lexislatura o parque publico ata chegar ás 8.000 vivendas e desenvolver chan para 20.000 vivendas protexidas e 5.000 vivendas libres

A Xunta vén de licitar hoxe a redacción dos proxectos e a construción de 57 vivendas de promoción pública en San Paio de Navia, en Vigo, ás que se destinará un investimento de 12,8M€. Trátase dunha promoción de vivenda protexida destinada ao alugueiro público e as empresas poden presentar as súas ofertas desde este martes 20 de agosto ata o día 11 de outubro.

En concreto, licítase os servizos de redacción de proxecto e dirección de obra e de contratación das obras de construción, con técnicas industrializadas e o uso de madeira, de dous edificios de 38 e 19 vivendas de promoción pública nas parcelas M-IVA-6 e M-IVA-3 do polígono 1 de Navia. Na parcela M-IVA-3 prevese a construción dun edificio para 19 vivendas de promoción pública, garaxes e rochos. Esta parcela ten unha superficie duns 844m2 e o plan parcial permite a construción dun inmoble cun máximo de 3 alturas máis ático.

Na parcela M-IVA-6 prevese a construción dun edificio para 38 vivendas, garaxes e rochos. Esta parcela ten unha superficie de 1.229 m2 e o plan parcial permite a construción dun inmoble cun máximo de 3 alturas máis ático. Estes dous inmobles constitúen a segunda promoción que se executará en San Paio de Navia que incluirá a aplicación de técnicas construtivas industrializadas, despois dos outros dous edificios que albergarán 58 vivendas nas parcelas M- IVB-20 e M-IV22, cuxas obras saíron a licitación o pasado día 19 de xullo.

Neste sentido, a execución das obras de edificación levarase a cabo mediante novas técnicas de construción industrializada, aplicando unha ou varias patentes, que permitan axuntar arquitectura con prefabricación, nunha relación que permita optimizar (en prazo, en prezo, en sustentabilidade, en seguridade e/o en calidade e mellor uso e mantemento durante a vida útil do inmoble) a referida promoción.

Entre as técnicas industrializadas que se inclúen nas bases da licitación está o emprego de madeira, tanto na estrutura dos inmobles como en outros elementos dos mesmos.

A construción deste grupo de vivendas conta con financiación europea, de xeito que a Xunta asumirá o 77,4% do coste, mentres que o 22,6% restante corresponde a fondos da UE a través do Plan de Recuperación, Transformación e Resiliencia. Este novo proxecto cumpre o Real decreto 853/2021, de 5 de outubro, polo que se regulan os programas de axuda en materia de rehabilitación residencial e vivenda social do Plan de Recuperación, Transformación e Resiliencia. En concreto teñen en conta as prescricións sobre eficiencia enerxética, consumo de enerxía non renovable, circularidade e xestión de residuos, que se reflicten no dito decreto.

San Paio de Navia Coa licitación deste grupo de vivendas, a Xunta xa ten en licitación ou proceso de adxudicación 316 das 359 vivendas de promoción pública que vai construír no Polígono 1 da ampliación do barrio vigués de Navia. Neste Polígono 1 están a desenvolverse as obras de urbanización e, co obxectivo de que estas vivendas poidan ser unha realidade o antes posible, desenvolveranse de forma paralela aos traballos construtivos dos edificios residenciais.

Ademais das 359 vivendas de promoción pública, o parque residencial da cidade de Vigo reforzarase coa habilitación neste mesmo polígono de solo para a construción de 374 vivendas protexidas.

Tamén, a Xunta ten neste momento a licitación as obras de urbanización do polígono 2 por un investimento de preto de 16,4M€, para acometer o acondicionamento desta zona, fases A e B de San Paio de Navia, que permitirá a construción dun total de 719 vivendas.

O Goberno galego segue avanzando no seu compromiso da mellora da situación do mercado da vivenda, e na Estratexia de vivenda pública e protexida que prevé, nesta lexislatura, duplicar o parque público ata chegar ás 8.000 vivendas e desenvolver chan para 20.000 vivendas protexidas e 5.000 vivendas libres.