O CONCELLO DE NIGRÁN DOBRA O NÚMERO DE PRAZAS DA ACTIVIDADE MUNICIPAL DE TEATRO PARA MAIORES

Pasan de 15 a 30 e as persoas interesadas deben apuntarse o 27 de setembro abonando 25 € por todo o curso. O obxectivo é fomentar as relacións sociais e a saúde a través das artes escénicas

Teatro do Ar, encargada da Escola Municipal de Teatro, será novamente quen imparta estas clases

“Sabemos que hai moito talento no noso Concello e tamén queremos abrir as portas aos máis maiores para que aprenden e se animen a actuar”, indica a edil de Maiores, María Mayán

O Concello de Nigrán redobra este curso a súa aposta polo teatro como medio para fomentar unha vida activa e saudable para as persoas maiores. Así, repite coa compañía de Nigrán Teatro do Ar a experiencia piloto do ano pasado de ofrecer á veciñanza de máis de 60 anos esta actividade que, paralelamente, mellora da saúde mental e física das persoas. Así, tras ter rodados as primeiras alumnas a súa primeira película ou webserie, este novo curso o Concello decidíu crear dous grupos, duplicando así as prazas, que pasarán de 15 a 30. As persoas interesadas (deben estar empadroadas no municipio e ter máis de 60 anos) deben incribirse no Salón de Plenos do Concello o venres 27 de setembro a partir das 9:00 horas abonando os 25 € de todo o curso completo (só se aceptará pago mediante tarxeta e as prazas distribuiranse por rigorosa orde de inscrición, sen posibilidade de que unha persoa anote a terceiros).

“Durante todo o ano ofrecemos desde o Concello diferentes cursos de ‘envellecemento activo’ e agora redobramos a aposta do teatro para maiores como actividade municipal específica, porque porque quedou demostrado que facilita a integración social, a memoria e mesmo a mobilidade” , explica o alcalde, Juan González, quen destaca que os maiores “son, precisamente, o público que máis acude ao teatro cada vez que o Concello ofrece funcións”. “Sabemos que hai moito talento no noso Concello e tamén queremos abrir as portas aos máis maiores para que aprenden e se animen a actuar”, engade a edil de Maiores, María Mayán, quen recoñece que foron eles mesmos os que demandaron esta actividade no 2023.

As clases serán os xoves de 17.30 a 19.00 h no centro de maiores de Vilameán en Nigrán, e os venres co mesmo horario no CPI Arquitecto Palacios de Panxón. Ademais de aprender a facer teatro, tamén se realizarán actividades para mellorar a mobilidade, as relacións sociais e o benestar dos maiores. “Queremos ensinar que o teatro é unha ferramenta moi completa para mellorar a nosa saúde”, destaca o director de Teatro do Ar e da Escola Municipal de Nigrán, Pedro Rodríguez, quen subliña tamén o talento agochado que hai entre a terceira idade. “O ano pasado demostraron a súa valía representado a súa propia obra ‘Anarquía na residencia’, unha comedia absurda que falaba dun grupo de vellos e vellas que daban un golpe de estado na súa propia residencia para tomar o control das actividades que querían facer”.

“Somos un Concello que presta especial atención ás artes escénicas cunha programación estable cada outono a través de Fegatea, polo que hai moita afección en Nigrán, así que corresponde dispor tamén desde a administración das ferramentas necesarias para que a xente poida facer teatro”, finaliza o alcalde.